عندما تزرع #بعض_الغروب جناين وجد :
.. كانت ف قمة تألقها بفستانها الازرق المخملي الذي يظهر مفاتنها وروعة جيدها وسحر قوامها عندما رفعت عيناها ويدها لتربط الكرافت ، ولكنها بدلا من ان تفعل احتضنت وجهه بكفيها وبدأت تتحسس قسماته ببطء وتتأمل عيناه الحائرتان وهما يستجديانها :
أدهم : ( وهو يطوق خصرها ) كنت مستني منك كلمه .. كنت مستعد أهد الدنيا عشانك ، المفروض النهارده أكون أسعد واحد ف الدنيا وانا جوايا حزن الدنيا .
عايده : صدقني هتنسى وتفرح وتتبسط ، سحر بنت حلال وبتحبك ، هتجيبلك ولاد زي القمر شبهك وحتة منك ،
يحبوك ويلعبوا معاك وتحبهم اكتر مني ومن نفسك ، بس اوعدني لما تخلف بنت تسميها عايده ، ولما تشيلها بين ايديك إفتكر إنك سميتها على اسم واحده ضحت بحبها عشان متكسرش قلب أمها .
ادهم : ( وعيناه مغرورقتان بالدموع ) .. عايده ارجوكي ارحمي نفسك وارحميني .
عايده : ( وهي تمسح دموعه بيدها ) انا كفايه عليا اوي اللحظه دي اعيش عليها عمري كلو .. وانت مش هتنساني يا ادهم .. صح ؟ .. هتفتكرني لحظه حلوه ف حياتك .. نسمة هوا صافيه مرت على حياتك .. وانا عمري ما هصحى من حلمك .. وهحبس نفسي جواه .
ادهم : لسه ياعايده الفرصه قدامنا قولي آه وأنا اواجه الدنيا عشانك .
عايده : حرام مقدرش .. سحر ذنبها ايه يكسر قلبها .. امشي يا ادهم .. روحلها .. هي دلوقت مستنياك والفرحه مش سيعاها روحلها عشان خطري .
أدهم : مش قادر اسيبك .. أنا بحبك أنتي .. قوليها واحييني .
عايده : ( وهي تستجدي دموعها ان لا تستجيب .. ) لو بتحبني بجد امشي .. متصعبش الموضوع علىا وعلى نفسك أكتر من كدا أرجوك .. وأنا عادي مش زعلانه .. واديني بضحك اهو .. النصيب عايز كدا .. اعمل ايه انا .. امشي بئا أرجوك .
(قالتها وأدارت ظهرها له ليذهب ويتركها لفيض دموعها وقلبها الموجوع يعاتبه بعد أن رحل : سبتني ليه كنت استنى شويه
.. كنت احضني وبعدها امشي .. كنت استنيت يا ادهم يمكن كنت اقولك متسيبنيش مهما حصل ..
متسيبش ايديا .. كنت عايزه احضنك قبل متروح ومترجعليش تاني .. آآآآآآآه .. ياريتني مشوفتك
ياريتني ماجيت .. استنى يا ادهم ... وانطلقت عايده خلفه تسبقها دموعها .. ) .
محمود حرزاوي
ليست هناك تعليقات:
إرسال تعليق