وانت عزوز بديتي
ركبتي قطار العمر وتقاصيتي
بالله ننشدك...
شنهو ريتي...
وقداش فارس بالرموش رميتي
وقداش ما ضحكتي بزهو واجليتي
وقداش ما لبستي سمح وتعريتي
وقداش من حلو الزمان خذيتي
وقداش على صبع الندم عضيتي
وقداش يا سمح الميامي ريتي
بالله ننشدك....
شنهو شفتي....
وقداش ضيفتي وياما ضفتي
وقداش من صافي الحليب رشفتي
وقداش ما قلقت على الحباب وخفتي
وقداش دمعك فى الغياب ذرفتي
وقداش ما زرعتي طيبة وعطفتي
وقداش ما على شاهى الحباب حلفتي
وقداش ما تعنطزتي وياما عفتي
وقداش غرفة من العناد غرفتي
وقداش نخلة عالية حذفتي
وقداش حصة في الجمال خذيتي
وقداش قدروك الناس وتعلليتي...
نبي نفكرك....
قالت ياما شفنا.....
وياما لعبنا في صغر وتحاذفنا
وياما بمعزة للحبيب حلفنا
وياما زعلنا بود وتقاطفنا
وياما حكينا قصص لسوالفنا
وياما بقينا السعد لمصادفنا
وياما صبرنا على الحباب وخفنا
وياما سكبنا من دموع ذرفنا
وياما حيينا فرح بمواقفنا
وياما طفينا فرح كان وقفنا
وياما ملينا أطباقنا وغرفنا
وياما صرفنا مال وإصرفنا
وياما حكاوي في شعرنا وصفنا
وشوف وين تيار الزمان حذفنا....
اييييييييه ياما شفنا.........
ياما فرحنا باللبن والخيل
وياما تغزلنا في نجم إسهيل
وياما عيينا مع الطبول نميل
وياما سهرنا للحبيب الليل
ولايوم من خوف المخاوف خفنا
ولا يوم بعنا عرضنا وشرفنا
وشوف وين تيار الزمان حذفنا......
ايــــــــــه..ياما رينا............
وياما لعبنا فى صغرنا وجرينا
وياما مشينا على الحباب وجينا
وياما طوينا ليل في سهارينا
وياما على قصص الغرام حكينا
وياما على قلوب العزاز قسينا
وقداش من شوق الفراق بكينا
وقداش ما كسبنا باطلة وسمينا
وياما حملنا من حمول رزينا
وياما كمينا سر يا غالينا
وليام كانت زهزها في إيدينا
كلما نفكر فيه بيه تجينا
واليوم هانا عاجزين بدينا
وتقول ما عمر الزمان عرفنا....
وتقول يا نفيسه ما في زمانك ريتي
العزاز ينشدوا وانتي عزوز بديتي.....
ركبتي قطار العمر وتقاصيتي.......
إبن الحــــــــــاضر.
ليست هناك تعليقات:
إرسال تعليق