في الحب مضام
يا ناس في الحب مضام
نڨول نحبك موش كلام
......................
بين الدنيا و بين الدين
قسمتيلي قلبي شطرين
غزرتيلي بنظرات العين
والحال رمضان صيام
هكا رميتيني بوجهين
النظرة من عيوني حرام
حالف ما نفطر رمضان
قلبي ضعيف ما يتحمل
في الزين عاشق ولهان
كيف نهاري باش نكمل
في جرة مهرة لحصان
لا نرقد لا يجيني منام
تتعدى تغزرلي بالعاني
تخليني نغلي دخلاني
مريض وفي حبك فاني
صايم وما نقول كلام
بالقوة شادد لساني
بعثت جواب مع لحمام
تتعدى تغزرلي في عيوني
تحيرلي في الحب سكوني
صايم ما تحملت محوني
رافع راية السلام
عيونك مجنون يخلوني
حكموا عليا بالإعدام
و أنا في حبك مضام
/عماد.علي.ج/🇹🇳🇹🇳
ليست هناك تعليقات:
إرسال تعليق