ايه حكايتك ياعم غريب
ياريت علينا ترويها
حكايتي هقولها واسمعني
أولها كانت فرحه
و بيتي بالولاد طارحه
كبروا العيال من خيري
و رغبتهم كانت الهجره
و فضلت أنا و أم العيال
كأننا عايشين في تربه
و السنين سرقت عمرنا
و لا فيه رساله و لا مكالمه
في الدنيا ماليش غيرهم
لا قرايب و لا أحبه
و لا بيسأل علينا
و الدنيا بقت صعبه
شالت أمهم الهموم
رحلت و صبحت و حدي
لا أعرف أنا عنوانهم
و عانيت من الغربه
عايش في بيتي غريب
ليلي نهاري في وحده
قررت أسيب بلدي
و أجرب مكان تاني
لو عادوا يوم ولادي
يتوهوا عن عنواني
سيبت البلد و هاجرت
أقضي هناك سنيني
غربه هنا و هناك
و سايب بلدي على عيني
لو مت هنا أو هناك
مين هيتكفل بتكفيني
و لا يقف على غسلي
و يقف على قبري يلقني
و يدعيلي في أي وقت
لو صادف و افتكرني
هعيش كام سنه
وايه فاضل من عمري
سنه أو سنتين
جايز في الغربه
ألاقى حد يسأل عني
و يعوض علي ربنا
في اللي راحوا مني
و دي حكايتي بقولهلك
ادعيلي كل ما تفتكرني
(((أسامه جديانه)))
ليست هناك تعليقات:
إرسال تعليق